Galicia e a Comunidade de Coordinación de Desenvolvemento Rexional do Norte de Portugal traballan xuntas na redacción dun Plan de investimentos conxuntos na Eurorrexión e nun programa de fomento de intercambio e fomento da mobilidade entre estudantes, profesores e investigadores a ambos os lados da fronteira. Así o subliñaron o presidente da Xunta, Alberto Núñez Feijóo, e o presidente da Comisión de Coordinación e Desenvolvemento Rexional do Norte de Portugal (CCDR-N), Emídio Gomes, logo da xuntanza mantida esta mañá, o primeiro encontro con carácter institucional que se produce entre ambos os mandatarios.

Celebrarase unha nova reunión da Comunidade de Traballo Galicia-Norte de Portugal no mes de febreiro onde se afondará nas novas liñas de actuación que se están a potenciar para adaptar as estruturas deste organismo ás novas exixencias da Unión Europea. Uns eixes de traballo, que segundo lembraron Feijóo e Emídio Gomes pasan por axustarse aos obxectivos da Estratexia 2020 para acadar un crecemento intelixente, sustentable e integrador; e por adaptarse ás exixencias derivadas do novo marco financeiro comunitario para o período 2014-2020.

A este respecto, tanto o presidente da Xunta como o titular da CCDR-N coincidiron na necesidade de traballar xuntos para lograr a máxima captación de novos fondos europeos para avanzar un chanzo máis na cooperación a ambos lados da fronteira.

FONTE: Xunta de Galicia